Hamasna

صورة و معنى ( العدد السابق )

	طووول النهار ( الفراعنة رايحيين .. و الفراعنة راجعين ) و قصدهم بهذا الوصف ( المنتخب الوطنى المصرى ) . و أنا رأيى انهم ( يحنطوا المنتخب ) و يخلصونا !
	الشباب اللى بيفكر كويس و لديه موهبة أو شهادة عليا لازم يسافر فى الخارج علشان هناك فى الخارج بيقدروا العقول كويس .. بينما فى دول أخرى متخلفة بيقدروا " البطون كويس " مش العقول !!
	كل الشباب حاليا بيفكر فى الزواج و دا طبعا ( حق مشروع ) لكن اللى مش مشروع ( انك تتجوز ) :)) روح اشتغل ( 20 سنة اشغال شاقة ) علشان تعرف تجيب الشقة.

	( المذيع الحقنة ) هو خلاصة المحسوبية و المجاملات فى الوسط الإعلامى .. من أهم صفات المذيع ( الحقنة ) أنه دائما يحب المنظرة و يتكلم عن نفسه و عن علاقاته المتعددة و عن خوارقه و انجازاته و معجزاته . و تجد نتيجة أفعاله و تصرفاته ( صفر عـ الشمال ) و لا تستطيع ان تستخرج أى حكمة او أفادة من كلامه .. لأنه عادة بيكون كلام هايف أو عبيط .
	بعض الاعلاميين فى الوطن العربى ( مجرد عرائس يتم تحريكها من خلف الستارة السوداء أو الحمراء ( حسب احوال الطقس ) . و هؤلاء سبب إضلال الناس و إبعادهم عن دينهم و عقيدتهم .. حيث تقوم جهات ( مشبوهة ) بتحريكهم فى أوقات محددة .. و انا رأيى ( ان الحبل اللى بيحرك العرائس لازم يتقطع ) .
	تلاقى الضيف قاعد فى البرامج ( أياها ) و بيدافع عن منهجه العلمانى و يبرر الاخطاء و المصائب الذى تسبب فيها .. و تلاقيه متردد فى كلامه و رد فعله .؟ و تلاقى الوحد منهم خايف الناس تكتشف ان ( الفيشة بتاعة دماغة متشالة ) !!

	لو كل واحد مننا ( عمل search على دماغه ) يا ترى هيطلع خير و اللا شر ؟؟ أدعوا نفسى و الجميع ان نقوم بعمل بحث دورى على العقول قبل القلوب .. و اول ما تعرف عقلك .. يسهل جدا انك تعرف قلبك و من عرف قلبه فقد عرف ربه .
	انت يا شاب يا مسلم .. انت مش مذبذب ابدا .. و عمرك ما هتكون مذبذب .. لأن انت منهجك واضح و طريقك ربنا رسمه لك .. و الشرط الوحيد انك تسمع كلام ربنا بس . اوعى تيجى فى يوم من الايام و تقول ( ان الدنيا سوداء ) .. لأن الدنيا عمرها ما تسود فى وجه المؤمن .. و دائما هناك باب مفتوح لا يغلق أبدا .
	فى الأفلام الامريكية الحديثة و التى تستهدف السوق العربى بطريقة مقصودة .. تجد فيها ان البطل ( خمورجى و قمارجى و حرامى و يزنى و حالته بالبلاء الأزرق فوق دماغه ) . و فى الاخر ( يطلع منقذ للبشرية و بيحب وطنه ) .. و احنا بنسأل و نقول هل هما فعلا عايزين جيل تحررى - وطنى - منقذ للبشرية ؟؟؟

	اللى يفكر ان الفيديو كليب ( اغراء فقط ) لمؤخذه عبيط شوية!! الفيديو كليب هذا معمول بتخطيط و تنظيم .. و القنوات الغنائية بينهما تناسق و تكامل و توزيع ادوار دقيق و مرسوم .. هؤلاء يرسمون نمط للحياة الشبابية المرفهة .. يهدفون من خلالها الى تدمير الاخلاق و تمييع المصطلحات .
	فيه فرق بين الدولة الفاضلة ( بتاعة أفلاطون ) و الدولة الفاضية ( بتاعة فودافون ) !!
	حقيقة نحن فى عصر ( الصرعة ) و ليس ( السرعة ) .. و فى رأيى المتواضع .. ان على كل مصروع انه يهدأ شوية .. و يخلى باله من نفسه فى هذا الزمن الأغبر . احسن احنا من كثرة ( الصرعة و المصاريع ) أصبحنا أمة مصروعة تسير بالتصارع .

	مالك يا عمنا العقيد القذافى .. مرة قومية و مرة أفريقية .. و بعدين تخليها أمريكية .. و يا خوفى احسن تبقى لاتينية و اللا فرانكفونية و بكده حققت رقم قياسى فى موسوعة " الكوسة السياسية " ..
	بلغ حجم التجارة الإلكترونية فى " تركيا " مليارات الدولارات .. و المعروف ان الشباب التركى يحب الإنترنت لأنه يحقق من خلاله أرباح مادية .. مش زى الشباب العربى .. اللى تلاقى الشاب طول النهار و الليل قاعد يحكى عن مسلسل " بكار و كونان " .. و نص ساعة كاملة يسلموا على بعض (!)
	شاهدت على التلفاز " وزير الفراعنة و التحنيط " أقصد " وزير الآثار " و طوال برنامج كامل يتحدث عن اكتشاف تاريخى بجهاز اشعاعى يتعرف على عمر التحنيط لجثث الفراعنة (!) .. و باختصار اقول له " لو عايز تعرف سر التحنيط " أسأل الحكومة اللى محنطة نفسها من أيام الثورة الله يرحمها .
	" الراقصات عــ العين و الراس و اشطب الدعاة مــن الكراس " هذا لسـان حال المؤسسات الاعلامية التابعة للمعبد القديم .. حيث يقوموا بتلميع الراقصات و ابراز جوانب الهيافة و العبط .. بينما الدعاة المثقفين و التنويريين محرومين فإما ان يظهروا فى برنامج ( للهجوم على الإسلام ) او برنامج ( خلف الأسوار ) !!
	تقرير تنموى عربى .. بيقول ان لو الفساد فى العالم العربى انتهى .. سيتضاعف أجر المواطن العربى ( 5 أضعاف ) و سيقل عدد الفقراء الى النصف !!
	هناك مجموعات من المسابقات المبتكرة و التى تهدف الى تنظيف جيوب الشعب المطحون .. فتجد اعلان مفاجىء .. يقولك " اطلبنا على 0777 ) و بكده تكسب معانا الجايزة الكبيرة جدا .. و انا بقولك ( قابلنى لو كسبت حاجة منهم ) .
	للدعاة بالذات .. و خصوصا الدعاة العاملين .. حاول ألا تبتعد كثيرا عن بيتك .. و كن صديقا لأبنائك .
	ظهرت العديد من الكتب و الدراسات و التى تهدف الى خلط التكنولوجيا بالإسلام .. و هذا فى حد ذاته شىء جيد جدا .. لكن المشكلة ( مين اللى هـ ينفذ هذا الخلط ) .. فالحكومات لا تهتم بالإسلام و الشعوب لا تهتم بالتكنولوجيا !!
	الباب الوحيد اللى مفتوح أمام الشباب الطاهر ( هو باب الدعوة ) بعدما أغلقت كل الأبواب .. و مش ممكن الدعوة تقولك ( المعلم بيسلم عليك و بيقولك فوت علينا بكرة ) .. انت فاكرها كوسة زى اللى بالى بالك !
	بعض ( ولاد الحلال ) من الحيتان و الفاسدين و المرابين و سارقى القروض ينامون ملء جفونهم و كأنهم رهبان بالليل فرسان بالنهار .. و الحقيقة أنهم ( حرامية بالليل و ............. بالنهار ) .
	يا رب .. يا رب .. كل من سمح للشركات متعددة الجنسيات بنشر الثقافة الأمريكية يعتقل فى " أبو غريب " أو " طرة " .. و مافيش فرق .

جميع الحقوق محفوظة لموقع حماسنا