والله عــار
الدكتور بشار فضل احمد - حماسنا
------
الاخوة
الاحباء السلام عليكم و رحمة الله وبركاته. . .
انا طبيب عظام وفي حياتي لم اكتب سطرً واحدا لا من الشعر و لا من القصص
او ما شابه ذلك , و لكن و الله قلبي يتمزق و انا ارى و اسمع و اقرأ ما
يحدث في فلسطين الحبيبة وكيف نتهم و نشتم احدانا الاخر, و قد اخذت
القلم و كتبت هذه القصيدة من قلب ينزف و للاسف من اخوانه و احبائه و
ابناء شعبه.
اناشد واتوسل الى الاخ رئيس دولة فلسطين ابو مازن و الى الاخ اسماعيل
هنيه و الى كل العقلانيين في هذا الشعب المعطاء ان نراجع انفسنا
واوراقنا وان نجلس ونتحاور وان نحمي شعبنا من شرخ قد يدوم لعشرات
السنين وان نلتحم ونكون كالجسد الواحد,وأن نسأل انفسنا ان كان هذا
الشعب العظيم يستحق ما يجري له.
اسميت القصيدة
"والله
عار"
واهديها الى روح القادة الذين حافظوا على وحدتنا الوطنية والذين كان
اراقة الدم الفلسطيني خطاً احمراً لديهم،
الى روح الشهيد القائد الرمز ياسر عرفات، الى روح الرفيق المناضل ابو
علي مصطفى ، الى روح الشهيد الجليل الشيخ احمد ياسين و الى ارواح جميع
الشهداء ، و الى جميع المعتقلين و الجرحى .
والله عار..... والله عار.....
تعال و شوف يا رحمة الختيار ...
تعال وشوف يا رمزنا يا ابو عمار ...
... ... ...
والله عار..... والله عار.....
تعال و شوف ابناء فلسطين ...
تعال و شوفهم يا شيخنا الجليل ...
تعال و شوفهم يا احمد ياسين
... ... ...
والله عار..... والله عار.....
تعال و شوف وضعنا وين صار وصفَى...
تعال و شوف يا ابو علي مصطفى...
... ... ...
تعالوا وشوفوا وفائنا للشهداء...
وفائنا إلكم وللدرة وحجو وبراء...
تعالوا شوفوا وفائنا للمعتقلين..
لسعدات والبرغوثي واعضائنا المنتخبين...
... ... ...
صمدتوا سنين وسنين..
وما قبلتوا ابداً بالذل و الهين...
ابداً ما قبلتوا بقتل ابن فلسطين..
و إلكم الخط الاحمر قطرة دم فلسطيني تسيل...
... ... ...
بحب اخبركم انه والحمد لله صرنا ايد وحدة ومتحدين...
ما في فتح و لا حماس ولا شعبيتين.
و صار عنا بدل الدوله دولتين..
و بدل الحكومة حكومتين...
وبدل الجلاد ثلاثة مش اثنين...
... ... ...
واما اذا بتسمعوا اخبارنا ....
فقامت وعملت وماقعدت ميليشيات الحمساويين...
واعتقلت وضربت وقمعت اجهزة العباسيين..
وفي الاخر يمكن تسمع او تشوف شو عملوا فينا المحتلين...
... ... ...
والله عار..... والله عار.....
على اللي بيجري و يصير في فلسطين...
انسينا القدس والاقصى وحق اللاجئين..
ابعدنا عن الهدف اللي كنا كلنا إلُه متوجهين...
صار هدفنا لا وطن ولا مواطنين..
هدفنا الحفاظ على هالكرسي اللعين...
... ... ...
19 شهيد.....نشجب و نستنكر وندين...
19 شهيد.....الله بعين واصبروا مع الصابرين...
19 شهيد.....بنعمل كل جهدنا نخفف هالعدد مع السياسيين...
19 شهيد.....اوعى فتحاوي يرفع راسه في غزة بصير لعين...
19 شهيد.....وبعدنا بنشتم بعض و بنسب وبنهين...
19 شهيد.....ما ظل غير نقسمهم لفتحاويين و حمساويين...
19 شهيد..... و بنحاول نقسمهم لعملاء وإنقلابيين...
... ... ...
والله عار..... والله عار.....
يا ناس فهموني شو اللي بيصير و شو اللي صار...
معقول في كل هالشعب المناضل والجبار...
معقول ما في عنا حكماء ولا كبار...
معقول ما في غيورين ولا احرار...
يلعن ابو هالكرسي... وابو اليوم اللي فيه صار...
اللي قدر يفرق بين اعظم ثورة و الثوار...
... ... ...
لازم نرجع نلم شملنا ونداوي جروح الثوار...
وننسى خلافات فتح وحماس واليسار...
ونرجع لعقلانيتنا ونبدَي الحوار...
ونحل مشاكلنا بدون سلاح ولا حجار...
في كل بيت في فتح و حماس وجبهاوي...و الأهم في ثوار...
... ... ...
بحب اقول لابو مازن والزهار...وبقول لكل قوى اليسار...
احنا ما بنقبل انه في الضفة سلام وفي غزة حصار...
ابن غزة اخوي وعمي وابني وابن احرار...
جرحه و صياحه والمه بفقدني صوابي وعقلي طار..
و انه شعبنا شعب الجبارين و الاحرار...
ولا يمكن يسامحكم وينسى اللي بصير واللي صار...
بترجاكم لموا جروح هالشعب وارجعوا له بالخيار.
¤¤¤¤¤¤¤¤¤¤¤¤
